Carta do Presidente
Jaime Aguirre de Cárcer y Moreno
Presidente de Mutua Universal
"Mutua Universal pecha o ano alcanzando novamente un balance positivo, mostra clara dunha saúde financeira e unha solvencia contrastadas."
Compráceme presentar o Informe de Xestión e Memoria de Sostibilidade co que anualmente compartimos o labor realizado por Mutua Universal no último exercicio e que se desenvolve en detalle no presente documento.
Co mundo sumido na lóxica incerteza derivada das guerras e das tensións xeopolíticas que están redefinindo o panorama global, as evidentes dúbidas sobre o desenvolvemento a curto e longo prazo do contexto político-económico e a lóxica desaceleración do crecemento a escala mundial, en España, 2025 foi un ano de contrastes.
Malia os fenómenos climáticos extremos que arrasaron boa parte do país e a inestabilidade do Executivo, coa conseguinte dificultade para aprobar grandes reformas e novos Orzamentos Xerais do Estado, reflexo dunha lexislatura moi condicionada pola aritmética parlamentaria, o mercado estatal manifestou certo dinamismo e capacidade de resiliencia, logrando un crecemento equilibrado e saudable promovido sobre todo pola demanda interna, impulsada polo consumo privado, e o investimento, importantes alicerces de desenvolvemento para os próximos anos, segundo indican voces expertas.
Este crecemento, sumado á moderación da inflación, explica en boa medida o avance do PIB español en 2025, que o Instituto Nacional de Estatística (INE) situou no 2,8 %, máis do dobre que na eurozona (1,2 %), o que fai de España un dos principais motores económicos da rexión. Ademais, a Seguridade Social, a segunda administración pública do país, alcanzou o maior número de persoas afiliadas da historia, 21,9 millóns de persoas ocupadas, co correspondente aumento dos ingresos por cotizacións. Son datos moi positivos que contrastan, porén, co déficit do sistema, que excede xa os 7.387 millóns de euros.
Neste contexto externo tan volátil, mentres o interno tende a unha moderada estabilidade, o sector das mutuas colaboradoras coa Seguridade Social seguiu contribuíndo á sostibilidade do estado do benestar que compartimos, mostrando a relevancia destas entidades sen ánimo de lucro no sistema sanitario, social e económico estatal.
Así o testemuñan os números da Asociación de Mutuas de Accidentes de Traballo (AMAT), representación patronal de todas as mutuas colaboradoras coa Seguridade Social que, ao peche de 2025, asumen a protección médica, rehabilitadora e económica por continxencias laborais de máis de 1,4 millóns de empresas, o 98,93 % do total do sistema, e máis de 19,9 millóns de persoas traballadoras, o 97,27 % do sistema. Estas entidades enfróntanse, ademais, ao pagamento dunha das principais prestacións do sistema de benestar español, a de incapacidade temporal derivada de continxencias comúns, que se consolidou como o segundo maior gasto da Seguridade Social –só superado polas pensións– e adoece dun financiamento historicamente insuficiente.
"A relevancia das mutuas colaboradoras coa Seguridade Social no sistema sanitario, social e económico estatal contribúe á sostibilidade do estado do benestar".
Hai demasiado tempo que a incapacidade temporal por continxencias comúns supón un impacto crecente sobre o conxunto do sistema, alcanzando niveis críticos. Ao peche do cuarto trimestre de 2025, a taxa de absentismo sitúase no 7,1 % das horas pactadas, o que supón que, cada día, preto de 1,6 millóns de persoas non acoden ao seu posto de traballo en España. Cifras do informe de absentismo laboral elaborado por Randstad.
Segundo os últimos datos publicados pola AIReF (Autoridade Independente de Responsabilidade Fiscal), organismo público independente adscrito ao Ministerio de Facenda que vela polo estrito cumprimento dos principios de estabilidade orzamentaria e sostibilidade financeira, entre 2017 e 2024 a incidencia das baixas por incapacidade temporal por continxencias comúns aumentou preto dun 60 %, a duración media fíxoo nun 15 % e a tendencia é á reiteración dos procesos, o que provocou que se triplicase o gasto nos últimos dez anos (desde 2014).
É esta unha problemática, a do absentismo laboral, estrutural, profunda e persistente, e o Ministerio de Seguridade Social xa a puxo na mesa da Organización para a Cooperación e o Desenvolvemento Económicos (OCDE), entidade internacional de carácter intergobernamental na que se traballa para dar resposta aos retos económicos, sociais e ambientais mundiais.
Desde o sector das mutuas colaboradoras coa Seguridade Social seguiremos ofrecendo toda a nosa axuda e predisposición para mellorar a eficacia e a eficiencia, poñendo en valor a nosa contrastada experiencia na procura de solucións. Farémolo reivindicando maiores competencias e reclamando a necesidade de ampliar a colaboración coa Administración, punto no que tamén incide a AIReF, que propón o desenvolvemento dun sistema de información integrado que permita a interoperabilidade plena entre o Instituto Nacional da Seguridade Social (INSS), os servizos autonómicos de saúde, as empresas e as mutuas colaboradoras coa Seguridade Social. Nesta cuestión xa se materializaron avances positivos na forma de convenios entre as mutuas e a Administración para a mellora da xestión da incapacidade temporal por continxencias comúns e a asistencia sanitaria en procesos traumatolóxicos no ámbito de diversas comunidades autónomas. A nosa porta sempre estará aberta.
No relativo a Mutua Universal, ámbito da nosa responsabilidade, a entidade pechou o ano 2025 logrando novamente un balance positivo, mostra clara dunha saúde financeira e unha solvencia contrastadas.
Cunha poboación protexida que supera por primeira vez os 1,8 millóns de persoas traballadoras, os ingresos por cotizacións sociais aumentaron un 4,59 % respecto ao exercicio precedente ata chegar aos 1.854 millóns de euros.
Grazas a unha responsable, rigorosa e eficaz xestión, Mutua Universal obtivo un resultado do exercicio a distribuír positivo de 23,98 millóns de euros, coas reservas adecuadamente dotadas garantindo a estabilidade financeira e a solvencia da entidade, o que lle retorna 15,97 millóns de euros á Tesouraría Xeral da Seguridade Social, mostra inequívoca do noso compromiso co sostemento do estado do benestar.
"Retornámoslle 15,97 millóns de euros á Tesouraría Xeral da Seguridade Social, mostra do noso compromiso co sostemento do estado do benestar".
Este crecemento, asentado sobre un robusto ecosistema innovador no que investimos 9 millóns de euros na mellora e na renovación de instalacións e servizos, afianza a calidade do noso modelo de atención híbrido, que garante o acceso universal e equitativo ao medicamento especializado e hospitalario combinando a asistencia presencial con avanzados servizos dixitais en remoto.
O meu debido recoñecemento e agradecemento, en nome propio e no de toda a Xunta Directiva de Mutua Universal, ao equipo de 2.074 profesionais da organización, motor da entidade, que co seu compromiso, talento e dedicación diaria sosteñen este modelo e a esencia mesma do mutualismo. Porque detrás de cada xestión, de cada actuación, de cada servizo, hai persoas coidando de persoas.
Grazas tamén a todas as empresas asociadas, traballadoras e traballadores protexidos e adheridos e entidades colaboradoras por seguirdes outorgándonos a vosa confianza, dándonos así un sentido e unha razón de ser.
Quero agradecer tamén ao noso director xeral, Juan Güell, polo seu liderado, responsabilidade e dirección estratéxica. Sempre coa mirada posta nas persoas e cunha visión innovadora que garante o mellor futuro para a entidade.
Á Xunta Directiva e ao Comité de Auditoría e Cumprimento por aseguraren o correcto funcionamento e a xestión da organización. E ás persoas e empresas que integran a Comisión de Prestacións Especiais e a Comisión de Control e Seguimento pola súa participación.
Tamén á Administración pública, coa que colaboramos e seguiremos construíndo unha relación sólida, e ao presidente e director xeral da Asociación de Mutuas de Accidentes de Traballo (AMAT).
Un recordo especial para o noso presidente honorífico, D. Juan Echevarría Puig, que faleceu o pasado mes de decembro á idade de 101 anos. O pésame, no meu nome e no de toda Mutua Universal, á súa familia e persoas achegadas.
Grazas.
