Carta do Presidente

Gustaríame expresar, no meu nome e no de Mutua Universal, o noso profundo pesar polas vítimas e o noso apoio e solidariedade con todas as persoas afectadas.

España pechou 2024 cun déficit da Administración pública, ente do cal dependemos as mutuas colaboradoras coa Seguridade Social por mor dun sistema de colaboración público-privada, do 2,8 % do PIB, segundo os datos publicados polo Ministerio de Facenda. Isto equivale a 44.597 millóns de euros (excluído o impacto das axudas pola DANA que permite Bruxelas), o que supón un descenso de sete décimas respecto ao 3,5 % do PIB rexistrado no anterior exercicio. É a primeira vez desde o ano 2018 que España se sitúa por baixo do límite de déficit excesivo do 3 % contemplado nas regras fiscais da Unión Europea, o marco de estabilidade comunitario.

Esta redución do déficit fundamentouse principalmente no crecemento da economía española, por riba da media da zona euro, e nas boas cifras do mercado laboral, cun aumento de afiliados e afiliadas á Seguridade Social que propiciou un incremento do 7,2 % nos ingresos por cotizacións sociais.

Malia estes números e as transferencias do Estado á Tesouraría Xeral da Seguridade Social, no peche do ano a Seguridade Social segue rexistrando un déficit de 9.834 millóns de euros, segundo os datos do Ministerio de Facenda, e unha débeda de máis de 126.000 millóns de euros, segundo os datos do Banco de España. Non é unha boa nova que, tras as sucesivas reformas do sistema, o aumento de afiliacións ou o incremento dos tipos de cotización e a base máxima de cotización, non se logre mellorar o desequilibrio da Seguridade Social. Está en xogo a sostibilidade do sistema.

No que respecta ás mutuas colaboradoras coa Seguridade Social, o sector asume a protección médica, rehabilitadora e económica por continxencias laborais de máis de 1,4 millóns de empresas, o 98,89 % do total do sistema, e preto de 19,5 millóns de persoas traballadoras, o 97,26 % do sistema. Ademais, as mutuas xestionamos o pagamento das prestacións económicas de incapacidade temporal por continxencias comúns, campo en que contamos con preto de 1,2 millóns de empresas asociadas (80 % do sistema) e máis de 15 millóns de traballadores e traballadoras (78,90 % do sistema).

A evolución do absentismo laboral derivado da incapacidade temporal por continxencias comúns, a segunda partida de gasto de maior envergadura que afronta anualmente a Seguridade Social despois do pagamento das pensións (contributivas e non contributivas), segue sendo moi preocupante. As ausencias ao traballo supoñen un custo importantísimo para as empresas, que ven minguada a súa produtividade e competitividade, para a economía no seu conxunto e para o sistema de Seguridade Social, cuxa saturación non permite enfrontarse como é debido a esta realidade. É neste ámbito da xestión da incapacidade temporal por continxencias comúns onde as mutuas manifestamos unha vez máis unha insuficiencia de financiamento.

Desde Mutua Universal reiteramos o ofrecemento á Administración pública de todos os recursos que sexan necesarios co obxectivo de adoptar as medidas oportunas para tratar de reverter esta tendencia e encarar os retos aos que se enfronta a sociedade no futuro.

No que respecta a Mutua Universal, ámbito da nosa responsabilidade, a entidade pecha o exercicio 2024 cunha poboación protexida que se sitúa nas 1.766.244 persoas traballadoras, con 159.095 empresas asociadas. Os ingresos por cotizacións sociais aumentan un 6,9 % respecto ao ano precedente ata chegar aos 1.779 millóns de euros, e o patrimonio neto da entidade ascende a 380,56 millóns de euros.

Cun resultado do exercicio a distribuír positivo, restituímoslle á Tesouraría Xeral da Seguridade Social 15,18 millóns de euros, mostra clara da boa xestión dunha entidade solvente e comprometida que coida do máis importante das persoas, a súa saúde, contribución innegable á sostibilidade do estado de benestar.

O meu recoñecemento, no meu nome e no da Xunta Directiva, a todo o equipo humano de Mutua Universal, 2.059 profesionais que o fan posible. A vosa vocación de servizo, compromiso, integridade e profesionalidade desde cada área da mutua é esencial para entender o excelente labor de colaboración coa Seguridade Social que levamos a cabo.

Quero darlles as grazas tamén a todas as empresas, traballadores e traballadoras e entidades colaboradoras pola súa inestimable confianza e colaboración.

Grazas ao director xerente de Mutua Universal, Juan Güell, pola súa visión de futuro para impulsar a estratexia da entidade cunha clara orientación ao servizo e ás persoas, mantendo o propósito que nos guía: protexer e coidar as persoas, contribuíndo á sostibilidade do estado de benestar.

Á Xunta Directiva e ao Comité de Auditoría e Cumprimento por asegurar o correcto funcionamento e xestión da organización. Ás persoas e empresas que integran a Comisión de Prestacións Especiais e á Comisión de Control e Seguimento pola súa participación. E ao noso presidente honorífico, D. Juan Echevarría Puig, polo seu apoio.

Tamén á Administración pública coa que colaboramos. O noso compromiso segue intacto. E ao presidente e director xerente da Asociación de Mutuas de Accidentes de Traballo (AMAT), patronal que desde este exercicio teño o pracer de representar como vicepresidente e que celebra este ano o 125.º aniversario da existencia das mutuas colaboradoras coa Seguridade Social, sempre comprometidas coa saúde das persoas traballadoras, a competitividade das empresas e a sostibilidade do noso sistema de Seguridade Social.

Moitas grazas.