Carta do Director

En España, o ano 2024 transcorreu entre as inevitables implicacións dos cambios políticos e acontecementos xeopolíticos mundiais e a evolución favorable da economía interna, que, grazas principalmente á fortaleza do turismo, ás exportacións, ao consumo público e á resiliencia da industria, conseguiu manter un crecemento do PIB por riba da zona euro e lograr unha desinflación gradual.

Todo iso tivo implicacións positivas no comportamento do mercado laboral, que pechou 2024 cunha afiliación media á Seguridade Social de 21,3 millóns de persoas, co menor nivel de paro dos últimos 17 anos, desde decembro de 2007, segundo datos do Ministerio de Inclusión, Seguridade Social e Migracións.

Neste contexto, durante o último exercicio, Mutua Universal ampliou un 3,13 % a súa poboación protexida ata alcanzar as 1.766.244 persoas traballadoras (1.483.459 por conta allea e 282.785 por conta propia), con 159.095 empresas asociadas, o que se reflicte nun aumento do 6,9 % en ingresos por cotizacións sociais, que se sitúan en 1.779 millóns de euros.

Este feito, unido ao bo comportamento do índice de incidencia das continxencias profesionais, dato que relaciona o número de accidentes de traballo ou enfermidades profesionais coa poboación protexida, que en 2024 diminuíu un 3,3 % respecto ao exercicio anterior, compensa en parte o incremento das prestacións económicas por este concepto.

Con todo, no que respecta ás continxencias comúns, o absentismo laboral derivado da incapacidade temporal por este motivo segue empeorando ano tras ano, e, a falta dun adecuado e necesario financiamento, supuxo en 2024 un aumento do 7,3 % das prestacións que tivo que asumir a entidade por estes procesos. Desde Mutua Universal e o conxunto do sector das mutuas colaboradoras coa Seguridade Social seguiremos traballando e colaborando coa Administración, á que lle ofrecemos todo o noso esforzo e os nosos recursos para reverter esta tendencia que lastra a produtividade das empresas, o benestar das persoas traballadoras e a competitividade da economía española.

Así e todo, Mutua Universal pecha o ano cun balance positivo nos principais indicadores de solvencia e liquidez, restituíndo 15,18 millóns de euros en forma de desembolso a favor da Tesouraría Xeral da Seguridade Social. Trátase dunha contribución incuestionable ao estado de benestar desde a actividade que nos é propia e que na actualidade vai moito máis alá do accidente laboral, como demostramos unha vez máis ao asumirmos as prestacións extraordinarias xurdidas para aliviar a situación das persoas traballadoras e empresas damnificadas pola DANA e facilitar a recuperación económica e social das zonas impactadas. Sirvan estas liñas para mostrar as nosas máis sinceras condolencias e solidariedade ás familias e seres queridos das persoas afectadas polo temporal.

Durante o último ano, Mutua Universal investiu 9,1 millóns de euros na reforma e o mantemento de instalacións e equipamento. Unha rede formada por 133 centros, dúas áreas de control hospitalario en Madrid e Barcelona e dous hospitais intermutuais en Bilbao e Valencia que, co reforzo de avanzados servizos dixitais en remoto como a Clínica Online, a nosa solución propia de telemedicina con máis de dúas décadas de experiencia, a telerrehabilitación, a eConsulta para consultas médicas rápidas ou a realidade virtual aplicada a terapias psicolóxicas, entre outras innovacións, foi quen de atender máis de 1,3 millóns de visitas de asistencia primaria, máis de 500.000 sesións de rehabilitación e máis de 6.000 ingresos hospitalarios en 2024.

Este desempeño, que garante o acceso universal e equitativo á medicina especializada e hospitalaria, só é posible grazas a un colectivo de 2.059 profesionais altamente cualificados que, con vocación de servizo, presta unha atención profesional, próxima, íntegra e responsable onde a innovación está sempre ao servizo das persoas.

É unha visión que fomentamos desde o Plan Estratéxico 21-24 “A Mutua das persoas. Colaboramos innovando”, que marcou as liñas de actuación da entidade durante os últimos catro anos poñendo as persoas no centro de todas as actuacións co obxectivo de humanizar a saúde e fomentar a colaboración e a dixitalización. Unha visión que agora queda totalmente integrada na organización co impulso do novo Plan Estratéxico 25-27 “Innovación ao servizo das persoas”.

O novo plan, que debe guiar o futuro de Mutua Universal nun contexto cada vez máis complexo, nace inspirado pola posta en marcha do programa Cibeles da entidade, unha iniciativa ambiciosa que desde hoxe lles dá resposta aos desafíos que están por vir. Porque temos a responsabilidade de mirar máis aló do presente, de anticipar o futuro. Unha ambición para 10 ou 15 anos que marca o inicio dunha gran transformación en todos os nosos ámbitos de actuación e de colaboración coa Administración e o sector. Por iso, baixo o lema “Innovación ao servizo das persoas”, o Plan Estratéxico 25-27 estrutura arredor de tres liñas estratéxicas o desenvolvemento de solucións innovadoras e personalizadas aplicadas á saúde e aos servizos, á eficiencia e á xestión intelixente do dato, á axilidade organizativa e ao talento interno. Todo isto mantendo sempre a mirada posta nas persoas, en liña co noso propósito de protexer e coidar da súa saúde e o seu benestar.

Vaia desde aquí o meu agradecemento ao conxunto de profesionais da mutua que, coa súa dedicación diaria e profesionalidade, fan posible que as nosas empresas asociadas e persoas traballadoras protexidas se beneficien deste ecosistema innovador áxil e inclusivo ao servizo da saúde das persoas, a competitividade das empresas e a sostibilidade do estado de benestar. Estas persoas encarnan os valores de integridade, proximidade, profesionalidade, responsabilidade e innovación con que a entidade presta os seus servizos.

Moitas grazas tamén a todas as empresas, persoas traballadoras e entidades colaboradoras que depositan a súa confianza na nosa entidade. Os nosos avances son vosos.

Por último, quero corresponder tamén ás persoas integrantes da Xunta Directiva de Mutua Universal por esixirnos sempre esa visión de futuro tan necesaria e por avalaren a estratexia da entidade. Tamén polo seu excelente labor de representación da organización. E ao noso presidente, Jaime Aguirre de Cárcer e Moreno, cuxo excelente labor á fronte da mutua se viu referendado co seu nomeamento como vicepresidente da patronal das mutuas de accidentes de traballo (AMAT) para os próximos catro anos.

Moitas grazas.