Persoas e talento

O traballo colaborativo consolidouse como un piar dentro do modelo de xestión de Mutua Universal polo seu grande impacto na eficiencia da xestión.

Mutua Universal implantou e fomentou o traballo colaborativo baseado nas últimas e máis adecuadas ferramentas dixitais, que están á disposición de todo o colectivo de profesionais da entidade para favorecer o seu correcto uso e aplicación.

Ademais, a organización facilita a formación pertinente nestas ferramentas, así como no propio modelo de traballo colaborativo, para que todas as áreas da entidade poidan traballar en equipo e compartir coñecementos, habilidades e recursos a fin de acadar un obxectivo común.

En Mutua Universal introduciuse o traballo colaborativo en diferentes áreas e proxectos para mellorar tanto a atención asistencial, eido no que a entidade conta cunha ampla experiencia na colaboración entre centros e profesionais para ofrecer sesións de telemedicina ou telerrehabilitación, como a atención administrativa, onde se traballa de forma colaborativa para axilizar e optimizar a xestión das solicitudes de prestacións diarias, de tal xeito que se reduzan os tempos de xestión e aumente a axilidade na resolución co obxectivo de ofrecer un servizo de máxima calidade que se adapte ás necesidades das nosas empresas asociadas, persoas traballadoras protexidas e adheridas, e asesorías colaboradoras.

O talento é unha prioridade estratéxica para Mutua Universal. Por este motivo, a entidade conta cun completo plan de formación continua dirixido a todo o cadro de profesionais distribuído polo territorio.

En 2023, Mutua Universal levou a cabo 835 accións formativas dirixidas ás persoas traballadoras da organización, das cales o 80 % se organizou de forma interna. En total, o equipo de Mutua Universal recibiu máis de 91 431 horas de formación nas súas diferentes modalidades, presencial e en liña. O tempo medio de formación de cada persoa traballadora da entidade é de 45 horas anuais.

En 2023, un total de 277 profesionais de Mutua Universal participaron en cursos, xornadas ou congresos en representación da entidade. Este é unha mostra clara do talento dos nosos e das nosas profesionais.

MELLOR PROXECTO DE TRANSFORMACIÓN CULTURAL NOS PREMIOS IMm

Mutua Universal foi galardoada na IX edición dos Premios IMm de xestión do cambio na categoría de mellor proxecto de transformación cultural pola súa nova intranet corporativa, Portal Universal.

Os Premios IMm identifican e recoñecen aquelas empresas que apoian e promoven o cambio nas organizacións, que marcan tendencias en materia de innovación e excelencia e que promoven a xestión do cambio como clave do éxito nas organizacións.

“Este premio é un recoñecemento á xestión do cambio dentro da nosa entidade e, en concreto, ao cambio cultural derivado da posta en marcha dunha nova intranet corporativa, pensada por e para todo o persoal de Mutua Universal”.

Esther Félix, directora de Dixitalización de Mutua Universal.

MELLOR ARTIGO NO IV CONGRESO INTERNACIONAL PREVENCIONAR

A entidade recibiu o recoñecemento ao mellor artigo no IV Congreso Internacional Prevencionar, evento que distingue o labor de investigación e innovación en materia de prevención.

O traballo Impacto biomecánico del sistema de elevación de las camas en el trabajo de la camarera de pisos, realizado por Ana Elvira Planas, José Antonio Tomás e María Ducun, de Mutua Universal, en colaboración con Carlos Senz, de Meliá Hotels, foi recoñecido como o mellor artigo presentado no congreso.

Mutua Universal
obtivo 7 candidaturas
premiadas en 2023

Premio saint-gobain á mellor práctica de construción sostible en españa

Mutua Universal resultou gañadora da I edición dos Premios Saint-Gobain á Mellor Práctica de Construción Sostible en España na categoría de Administración pública polo seu proxecto Mutua Universal Málaga-Centro Sostible.

Este recoñecemento, outorgado polo Grupo Saint-Gobain en España en colaboración co Club de Excelencia en Sostibilidade, reafirma o compromiso de Mutua Universal coa sostibilidade, o coidado do medio ambiente e a excelencia na xestión de recursos, contribuíndo así ao desenvolvemento dunha contorna máis saudable e sostible. Ademais, premia o esforzo da entidade en relación coa mellora continua na atención ás súas persoas traballadoras e empresas asociadas.

CONGRESO NACIONAL DA SOCIEDADE ESPAÑOLA DE TRAUMATOLOXÍA LABORAL

A XXII edición do Congreso Nacional da Sociedade Española de Traumatoloxía Laboral (SETLA), que reúne anualmente especialistas en cirurxía ortopédica e traumatoloxía laboral e que contou coa participación de 37 profesionais da saúde de Mutua Universal, recoñeceu dous traballos realizados por persoas da nosa entidade.

O traballo Tratamiento y evolución de una fractura intraarticular de calcáneo. A propósito de un caso clínico, elaborada por Marbely Mendoza, doutora do centro de Mutua Universal en León, destacou co premio ao mellor caso clínico. Pola súa banda, Olga Bexaide Crespo, enfermeira do centro de Mutua Universal en Oviedo, foi recoñecida co premio á mellor comunicación libre de enfermaría polo seu traballo Amputación de la falange distal de un dedo de la mano derecha por una mordedura de perro.

MEMORIA DE ACTIVIDADE CIENTÍFICA DE 2023

A investigación científica é fundamental e responsable dos avances médicos que nos permiten mellorar a prevención, o diagnóstico e o tratamento das enfermidades para contribuír a perfeccionar a calidade asistencial ofrecida aos nosos e ás nosas pacientes. A través da publicación Memoria de actividad científica 2023, a Dirección Médica de Mutua Universal pon en valor o traballo científico desenvolvido durante o último ano polo colectivo de profesionais da saúde da entidade:

Mutua Universal preocúpase de que as persoas que forman parte da entidade estean e se sintan ben. Por iso, imos un paso máis alá da lei de prevención para conseguir unha empresa saudable.

A finalidade do modelo de saúde corporativo de Mutua Universal, adaptado á realidade das organizacións seguras, saudables e sostibles, vai alén da prevención das lesións e o deterioro da saúde das persoas traballadoras para incidir no seu estilo de vida persoal e familiar desde a propia entidade.

En 2023 redefiniuse o modelo de saúde corporativo.

O plan recolle 112 medidas relacionadas con 10 ámbitos de actuación para a correcta conciliación entre a vida profesional e a persoal.